MBOTAMA YA MOKONZI YEZU 2015
« Ngondo akobota mwana mobali, mpe bakopesa Ye nkombo Emmanuel,
nkombo eye lokola’te Nzambe azali an biso » (Mt1, 23).
Mbotama, nsuka ya
bondeko ya Bolingo Nzambe akati na biso bato !
Bandeko ba bolingo,
Eyenga elamu ya Mbotama
na bino banso. Eyenga elamu ya boyei bwa Mwana-Nzambe epai ya biso bato, o nse.
Ya solo “nkembo na Nzambe o likolo, mpe o nse boboto na bato ba Ye ba bolingo”
(Lc 2, 14).
Eyenga ya Mbotama ya
mobu moye mozali koleka na kati ya matanga makweli biso na diocèse ya biso, na
Mai-Ndombe mobimba…Lokola toyebi, mokolo mwa mitano le 18 Decembre, tobungisi
bandeko 20 na likama lya mai lisalemi na libongo ya Inongo. Bandeko balingaki kokende
mobembo na Kiri. Tokanisa na bango. Tosambela mpo ya bango. Tosangana na mpasi
nab aye banso babungisi ndeko to moyebani. Toyeba mpe, bandeko, komibatela mpe
kobatela bomoi ya baninga na mibembo tozali kosala to kobongisa mpo ya bango…
Bandeko ba bolingo,
O mokili mwa Yudea na
mboka nkombo Bethleme, mokolo moko, eleki mibu nkoto mibale, mwana Nzambe
andimi kokoma moto, kobotama, lokola bana bake banso, na mama moko ya biso ya
nse (Gal.4, 4). Ezali ndoto te, ezali ya solo. Ezali likambo limemi na mokili
mobimba mbongwana(changement) ya nsomo mpo ya biso bato o nse. Mwana Nzambe
andimi kokoma moko wa biso. Andimi kolata botaw bwa biso bato ndenge tozali:
bomoto bwa biso mobimba, liwa mpe( Jn 1, 14). Soko olingi kokutana na Nzambe,
luka Ye o kati ya bato, mpenza mpenza bato babola, baye bazanga bato, baye
bazali na nzala, bato ya malady, baye bazali na boloko, bampaya (Mt 25, 31-46).
Nzambe ya ndenge boye, nde nani! Bondeko bonene akati na biso bokangi Ye na
moto nyonso, na bomoto bwa biso, na bikelemo bizali kozinga biso.
Bandeko ba bolingo,
Oyo nde ntina mpenza ya
feti ya Mbotama. Kobanda Nzambe akomi moko wa biso, moto nyonso, mpenza mpenza
moto oyo abwakama, moto oyo abengami “moto mpamba”, akoki kobinela bomoi. Akomi
na kilo ( valeur), azali lisusu Ye moko te, akoki komibwaka na makambo manso ma
bomoi. Ntina ya nyonso euti na bolingo ya ngolu ya Nzambe mpo ya bato (Tite 3,
4-7). Bobele bolingo bwa solo bokoki, ya solo, kobongola bomoi bwa biso,
kobikisa biso o mabe manso.
Yango wana, bandeko,
mobu moye mosantu mwa Ngolu Papa François asengi mpo ya Ekklezia mobimba, ezali
ya solo, ntango ya bomoi bwa sika Nzambe akabeli biso. Ezali ya solo nzela ya
mobembo ya ngolu ya Nzambe:ayei kotala biso mpo atambwisa makolo ma biso o
nzela ya boboto” (Lk 1, 79). Na mobu moye mosantu ya Ngolu ya Nzambe, tokoki
lisusu te konyokolo moninga, kotala moninga moto mpamba, kotiya moninga moto
pembeni. Ezali ntango ya etumba ya
bandeko mpo ya bato banso, mpenza mpenza mpo ya bandeko babwakama lelo. Ezali
ntango ya kosimba makasi bato bataw; ntango ya kolendisa baye balembi; ntango
ya komema esengo nab aye bazangi elikya. Na mobu moye mosantu ya ngolu,
tosengeli komifungwama. Mokonzi azali kosenga biso ‘te tomonisa ngolu ya Ye na
bato banso. Mokon,zi azali kosenga biso’te tokabola biloko nab aye bazanga.
Soko tosali bongo te, bolingo bwa Nzambe oyo tozali kosakola bokotikala bobele
maloba mpamba (1 Jn 3, 17-18).
Bandeko ba bolingo,
Kobanda ntango
Mwana-Nzambe amikomisi ndeko wa biso bato, tozali lisusu biso moko te mpo ya kotonga
mokili mwa sika, mokili mwa bosembo mpe ya bondeko. Elongo na Ye mpe o nkombo ya Ye, tosili tokoti
na “civilisation ya sika”, civilisation” Papa Paul VI abengi “civilisation ya
Bolingo”. Lelo, bandeko, tozali liboso ya nzela mibale ya bomoi: nzela ya
bondeko to nzela ya liwa. Na
nguya enene ya Bolingo ya Mwana-Nzambe oyo andimi kokoma “nsuni ya nsuni ya
biso, mpe makila ya makila ma biso, tokoma” bilombe ya bolingo” mpo ya moto
nyonso na kati ya bomoto bwa Ye mobimba, bilombe ya bolingo mpo ya bikelamo
binso. Bongo tokotonga solo mokili ya boboto, boboto boye bozali likabo ya
Emmanuele.
Bandeko ba bolingo,
Nzambe wa biso ayokela biso mawa mpe abenisa
biso( Nzembo 66) mpo’te biso tokoma bobenisi mpo ya baninga bato mpe mpo ya nse
mobimba. Bobele lelo na lobi te, kasi mikolo minso mizali koya na mobu ya sika
mokomi penepene, 2016.
Eyenga elamu ya Mbotama na banso!
Inongo, le 24 Décembre 2015
Wa bino Tata Episkopo,
+Philippe NKIERE KENA
